Ґеоґрафске положенє – локация Вербасу Општина Вербас облапя: Город Вербас, Бачке Добре Польо, Змаєво, Равно Село, Коцур и Савине Село. Гранїчи ше зоз општинами: Србобран, Мали Идьош, Кула, Темерин, Нови Сад, Оджак, Бачки Петровец и Бачку Паланку. Вербас зоз поверхносцу од 376 км2 лєжи у шерцу Бачкей, на важних крижних драгог як цо: пруґа Беоґрад – Нови Сад – Будапешт асфалтна драга Нови Сад – Србобран – Вербас –Зомбор, Вербас- Бачка Паланка и Вербас – Фекетич – Суботица. З оглядом же є 44 км оддалєни од Нового Саду и 60 км од Суботици туристично ґеоґрафийне положенє барз вигодне. Цо треба видзиц - знаменїтосци города: Сербска православна церква Вибудована є 1744. року и пошвецена Воведению Пресвятей Богородици. Образ поробел Й. Кистнер, 1862. року, а позлаценє Никола Дамшич. Руска церква Будована у периодзе од 1938. до 1945. року. Образи виробел сликар аматер. Римокатолїцка церква Вибудована є 1885. року и ма єдну олтарску слику: Богородица Имакулата. Образ виробел Йосип Копитар а хасновал олєй на платну. Реформаторска церква Будована у периодзе од 1822. до 1824. року. У тей церкви ше находза орґулї зоз 1842. року. Синаґоґа Пред Другу Шветову Войну у Вербаше ше видзвигла прекрасна Синаґоґа, котра цеком войни знїщена. Як доказ єй постояня, на месце дзе ше дакеди находзела, видзвигує ше шейцсуглови слуп котри припадал Синаґоґи. Сербска православна капела „Водица“ Дума ше же виробок капели започати 1793. року зоз копаньом студнї. Викопованє студнї обавене о трошку даякого тарговца Николици и нєпознатого Бунєвца зоз Суботици. Пошвецена є Святей Параскеви – Петки, року 1848. була очкодована, а 1952. року є оправена. Памятнїк Йожефови Кишови Тот памятнїк проєктантови Велького Бачкого Каналу, забера визначне место медзи знаменїтосцами у городзе. Находзи ше на возвишеню понад брану при Шлайзу. Йожеф Киш жадал буц ту поховани, без огляду же нє бул житель Вербасу. Як памятка на Йожефа Киша, нєшка на надгробним памятнїку стої слїдуюци натпис котри преложени на руски значи: „Ту вично почива Племенити Мадяр Йожеф Киш Будователь Франьового канала. Безшмертносц най виказує тот мрамор, блажено най спочива. Народзени року 1748. Умар у Зомборе 3. дня Мартовских ида року господнього 1813.“ Ґимназия Спрам доступних жридлох ґимназия основана ище 1809. року як Приватна латинска школа, и як така, еґзистовала до 1822. року. Инициятор за снованє тей школи бул новтаруш Андрия Мокри, котри як богати чловек, жадал своїм дзивком дац цо мож лєпше образованє. Приватни учитель, Йован Бласи почал подучовац новтарушово дзеци, и даскельо роки познєйше, дзекуюци своїм способносцом, орґанизовал школу и постал єй перши директор. О роботи школи до 1822. року постоя барз мало податки. Музей Року 1968., скупштина општини Вербас принєсла одлуку о основаню музейскей збирки, и за тоти потреби додзелює ше вила у улїци Маршала Тита. Причина за таку одлуку виходзи зоз факту же наставнїк историї и ґеоґрафиї, Иштван Дєнґе, уж досц длуго зоз своїма школярами зазберовал стари предмети. За кратки час музейска збирка була обогацена з рижнима предметами з прешлосци. Ту були експонати з обласци ремеселства, историї, етнолоґиї и археолоґиї. Пре рижни преселєня и крадзи нєстали велї експонати, медзи котрима порцелански судзини, лампи, оружия и ковани пенєж з рижних периодох. Пре нєадекватни просториї предмети почали препадац, 1993. року ше змесцую до просторийох дакедишнього гарешту у дворе вербаскей ґимназиї. Треба наглашиц же музей од свойого основаня робел у рамикох дома култури Вербас зоз Вербасу. Од 1993. року Драґица Вукотич орґанизатор роботи музею и стара ше о музейских експонатох. Априла 1998. року, музей достава як дочасне ришенє мали будинок бувшей порескей управи у дворе општинского будинку. Гоч простор нє адекватни, упарти роботнїки Дома култури поставяю сталну музейску поставку 15. октобра 1998. року. Експонати котри нє виложени и далєй су у депоу бувшого гарешту. Цо ше дотика археолоґийних експонатох зоз локалитету вербаскей општини, углавним ше находза у Музею Войводини у Новим Садзе. Шицко зоз шицким музей нєшка ма прейґ тисяч предмети нє рахуюци археолоґийни експонати котри ше инвентарую и находза у власнїцству Музея Войводини. Окреме ше видвоюю мена археолоґа Мариї Йованович и археолоґа Небойши Станоєва. Музейска збирка през найинтересантнєйши експонати и їх историю приказани у просторийох од єден до штири, а драга їх обходу, задумана як драга през вики. База „Центар” – Бапина база У Старим Вербаше, у улїци Миливоя Чобанского число 137 находзи ше Бапина база у котрей змесцени експонати, фотоґрафиї и историйни материял з Другей шветовей войни вязани за општину Вербас. У тих часох по цалей Войводини були формовани илеґални бази у котрих дїловали тайни штаби партизанских одрядох. На териториї општини Вербас було коло пейдзешац таки бази, а найпознатша Бапина база. Була змесцена у хижи Драґутина Раданова – Бапи. Нащивителє можу видзиц виложени материяли у преднєй хижи од улїци, дзе иншак жили домашнї, а у заднїм дворе єст окремна хижка, дзе робели илеґални политички роботнїки. Цо треба знац – История городу Мено Вербас ше перши раз спомина 1387. року (Гоч писатель историї Нового Вербасу, професор Лоц, наводзи документ, у котрим пише же ше мено Вербас спомина 1213. року як шедзиско маєтку двох дворянох по мену Orbaszpalataya). Кед вежнєме до огляду и археолоґийни виглєдованя, вец Вербас и його околїско постої уж 3000 роки. Вербас пре рижни освойованя бул валяни и пустошени, на його тлу були зменьовани велї народи котри охабяли за собу шлїди. Серби досц часто напущовали тото подруче, найчастейше то було пре войни, вилїви и рижни хороти жительох. На тим тлу зменьовали ше Келти, Язиди, Римянє, Славянє, Аваре, Ґермани, Хуни и Турки. Медзитим податки о тих часох барз оскудни. Значни етнїчни вименки наступаю 1720. року кед почина колонизация Руснацох, Мадярох и Нємцох на тоти простори (Вербас ше находзи споза Войней гранїци, а зоз самим тим и споза строгей контроли дворскей комори) Вербас 1772. року добил Урбариум з котрим обовязки селякох и кметох прецизно дефиновани и реґуловани. ПРИСЕЛЬОВАНЄ НЄМЦОХ Нємци населєли Вербас 1785. року и то 283. нємецки фамелиї зоз 1132 особами. ПРИСЕЛЬОВАНЄ РУСНАЦОХ Руснаци ше до Вербасу приселєли зоз прикарпатских обласцох. Перши фамелиї населюю Вербас 1746. року. Стредком XVIII вика, перше населєли Керестур, дзе були ошлєбодзени шицких даваньох у периодзе од штирох рокох. Поступно, зоз Коцура и Керестура Руснаци починаю насельовац и Вербас. 1850. року у Старим Вербаше було 70 фамелиї Руснацох, а 1860. року було 82 фамелиї. Насельованє жительох зоз Босни и Герцеґовини, Косова, Горватскей, Чарней Гори почина познєйше, после Другей шветовей войни. Вибудов гайзибанскей драги Пешта – Суботица – Нови Сад, як и копанє каналу ма вельке значенє за розвой индустриї, ремеселства и тарґовини. У кнїжки „Ґеоґрафске положенє бачких населєньох” визначує ше примат Вербасу над околнима местами, чому найвецей доприноши Вельки канал и желєзнїца. Найвчаснєйши докази шведоча же ше на териториї Вербасу садзела винова лоза, а дзекуюци чарней бари занїмало ше з ловом и риболовом, цо символично представене на найстаршим гербу Вербаса. На локалитету „Чарнок” пренайдзене и утвердзене же на тей териториї було заступене 7 домашнїх и 10 файти дзивих животиньох, о тим шведоча археолоґийни находзиска косцанїкох або часцох косцох. Лов и риболов були заступени зоз 32%, а домашнї животинї зоз 68%. Як вихасновац шлєбодни час у Вербаше? Нєшкайши темпо живота нам охабя барз мало места за шлєбодни час. Прето важне на прави способ окрепиц свой дух, так же голєм на кратки час бриґи и стрес охабиме збоку. Богатство историйного и културного нашлїдства нашого городу дава нам можлївосц на рижни способи випольнїц свой шлєбодни час. Нащива ґалериї зоз вше богатим репертоаром виложених вредносцох сиґурно у даяким смислу задоволї вашо потреби за уживаньом у тей файти уметносци. Нащива музею и розпатранє його вредносцох, сиґурно вас, голєм на час враци до прешлосци и дочара вам слику дакедишнього Вербасу чийи ше привредни и културни розвой скоро вше видзвиговал на найвисши ступень у поровнаню зоз општинами у окруженю. Городска библиотека „Данило Киш” дава вельки вибор кнїжкох, дзе любителє читаня шицких опредзелєньох можу пренайсц дацо по своїм смаку, алє и кнїжки едукативного змисту. Центер за физичку културу зоз своїма отворенима и завартима теренами забера значне место як за спортистох, тиж так и за тих цо ше рекреативно занїмаю зоз спортом. Цеком лєта базени преполни з людзми. Окреме атрактивне ноцне купанє як и числени манифестациї котри ше отримую на базену. Кед любице спорт можеце присуствовац и численим змаганьом и турниром фодбалу, кошарки, плїваню, рукомету и раґбию. У Вербаше ше каждого лєта отримує „Културне лєто” котре зоз своїм програмом збера вельке число гражданох на площи. Любителє природи и шетнї можу уживац у прекрасней главней улїци, парку спрам Коцура и шлайзу. Ноцни живот Медзи численима кафичами значне место за ноцни живот забераю Синдикат, Драма, Моменто...